الترياق الفاسد "هباءً منثورا"

كتاب الترياق الفاسد "هباءً منثورا"
المؤلف: عبدالرحمن الرداد

كان يستمع إلى كلامها بصدمة شديدة وأوقفها قائلا:
- ايه اللي يخلي واحد يلجأ للشياطين علشان يضر حد تاني من نفس جنسه ومؤمن زيه؟ ازاي الواحد يشوف حد قدامه بيتدمر بسببه ويكون مستمتع بده؟
ابتسمت وقالت بهدوء شديد يعبر عن مدى جاهزيتها للرد:
- الكره والحقد، تعرف إن الحسد والسحر نفس الحاجة؟ الاتنين ناتجين عن كره وحقد، أنت سبق وحسدت صاحبك ولا نسيت؟
اتسعت حدقتاه بصدمة لمعرفتها بهذا الأمر وأكملت هي:
- الفرق بس إني بطفي الكره اللي جوايا ده بترياق هسميه السحر أو العمل السفلي لكن اللي زيك بيطفي الكره والحقد اللي جواه بترياق اسمه الحسد وتمني زوال النعمة
حرك رأسه ليعبر عن رفضه لما تقول وهتف:
- بس ده مش ترياق أبدا أو ممكن يكون ترياق لكنه ترياق فاسد مش بيشفي أبدا، مش معنى إني حسدت حد أبقى وحش، غصب عني الحياة هي اللي حطتني في موقف زي ده
رسمت ابتسامة على وجهها وبررت:
- الترياق مش بيشفي لكنه بيريح، وبعدين ماتنساش إن الحياة اللي حطتك في الظروف دي هي برضه اللي جابتك هنا، وهجاوبك على السؤال اللي موجود جواك وهو هل هقدر أساعدك وأخليك من أغنى الأغنياء ولا ده مجرد نصب